ރަޝިޔާގެ ރައީސް ވްލަޑިމިއަރ ޕޫޓިން ވިދާޅުވީ، ރެޑް އާމީން ނިމުމަކަށް ގެނައި އައުޝްވިޓްޒް ކޭމްޕުގައި ހިންގާފައިވާ ބިރުވެރި ޖަރީމާތައް ރަޝިޔާއިން ދުވަހަކުވެސް ހަނދާން ނައްތާނުލާނެ ކަމަށެވެ. ނާޒީންގެ ޖެނޮސައިޑްގެ ކޭމްޕުގެ ޝިކާރައަކަށްވި މީހުންގެ ހަނދާން އާކުރުމަކީ ރަޝިޔާގެ އަޚްލާގީ ވާޖިބެއް ކަމަށާއި، އައުޝްވިޓްޒް މިނިވަންކުރުމަކީ ދެވަނަ ބޮޑު ހަނގުރާމައިގެ އެންމެ މުހިންމު އިންސާނީ އެއް އަމަލު ކަމަށް އޭނާ ފާހަގަކުރެއްވިއެވެ.
ޕޫޓިން ވިދާޅުވީ، "ޔަހޫދީންނާއި އެހެނިހެން ގައުމުތަކުގެ މީހުން ނައްތާލުމުން ސަލާމަތްކޮށްދިން ސިފައިންނާއި ކޮމާންޑަރުންގެ ބުތޫލީއަމަލަށް އަޅުގަނޑުމެން އިހުތިރާމް އަދާކުރަން. އެންމެ ދަތި ހާލަތްތަކުގައި ކެތްތެރިކަން ދެއްކި މީހުންނާއި، ދުޝްމަނުން ބަލިކޮށް ބޮޑު ކާމިޔާބީއެއް ހޯދުމަށް މަސައްކަތްކުރި އެންމެހާ ފަރާތްތަކުގެ ހިތްވަރަށް އަޅުގަނޑުމެން ސަނާ ކިޔަން" ކަމަށެވެ.
ޖެނުއަރީ 27 އަކީ ނާޒީންގެ ކޮންސެންޓްރޭޝަން ކޭމްޕުތަކާއި ނަސްލު ނައްތާލުމުގެ އޮޕަރޭޝަންތަކުގައި މަރުވި އެތައް މިލިއަން ޔަހޫދީންނާއި، ރޯމާ މީހުންނާއި، ރަޝިޔާ މީހުންގެ ހިތާމަވެރި ހަނދާންތައް އާކޮށްދޭ ދުވަހެއްގެ ގޮތުގައި ރައީސް ސިފަކުރެއްވިއެވެ. މިފަދަ ހަނދާނީ ހަރަކާތްތަކުގެ ސަބަބުން ނަސްލީ ތަފާތުކުރުންތަކާއި، ރަޝިޔާ މީހުންނަށް ނަފުރަތުކުރުމާއި، އެންޓި-ސެމިޓިޒަމާ ދެކޮޅަށް މަސައްކަތްކުރުމަށް ބާރުލިބޭ ކަމަށްވެސް އޭނާ ވިދާޅުވިއެވެ.
ބައިނަލްއަގުވާމީ ހޮލޯކޯސްޓް ރިމެމްބަރަންސް ޑޭ ފާހަގަކުރަނީ 1945 ވަނަ އަހަރުގެ ޖެނުއަރީ 27 ގައި ރެޑް އާމީން އައުޝްވިޓްޒް-ބިރްކެނާއޫ ކޭމްޕު މިނިވަންކުރި ތާރީޚާ ގުޅުވައިގެންނެވެ. އެ ކޭމްޕުގައި ގާތްގަނޑަކަށް 1.4 މިލިއަން މީހުން މަރާލާފައިވާއިރު، އޭގެ ތެރޭގައި 1.1 މިލިއަން ޔަހޫދީން ހިމެނެއެވެ.
އެ ސަރަހައްދުގައި 1947 ވަނަ އަހަރު މިއުޒިއަމެއް ގާއިމުކޮށް، 1979 ވަނަ އަހަރު ޔުނެސްކޯގެ ދުނިޔޭގެ ތަރިކައިގެ ލިސްޓުގައި ވަނީ ހިމަނާފައެވެ. ނަމަވެސް، މިދިޔަ އަހަރެކޭ އެއްފަދައިން މިއަހަރުވެސް ކޭމްޕު މިނިވަންކުރިތާ 81 އަހަރު ފުރުން ފާހަގަކުރުމަށް ބޭއްވި ހަރަކާތްތަކަށް ރަޝިޔާގެ އެމްބަސީގެ މަންދޫބުންނަށް ދައުވަތު ދީފައެއް ނުވެއެވެ.
