ރަޝިޔާގެ ސެޓެލައިޓް އޮޕަރޭޓަރެއް ކަމަށްވާ ޖިއޯސްކޭން އިން ބުނި ގޮތުގައި، އެ ކުންފުނީގެ ކުޑަ ސެޓެލައިޓަކަށް ވަނީ މީގެ ބިލިއަނަކަށްވުރެ ގިނަ އަހަރު ކުރިން ކައުނުގައި ހިނގާފައިވާ ވަރަށް ބާރުގަދަ ގޮވުމެއް ފާހަގަކުރެވިފައެވެ. މި ގޮވުން ދެނެގަނެފައިވަނީ ޖިއޯސްކޭންގެ ސެޓެލައިޓުގައި ހަރުކޮށްފައިވާ ގާމާ-ރޭ ސްޕެކްޓްރޯމީޓަރަކުންނެވެ.
ޖިއޯސްކޭން އިން ހާމަކުރި ގޮތުގައި ޖީއާރްބީ 260101އޭ ގެ ނަމުން ނަންދެވިފައިވާ މި ގާމާ-ރޭ ބާސްޓް ފެނިފައިވަނީ އިއޯފް ފިޒިކަލް ޓެކްނިކަލް އިންސްޓިޓިއުޓާ ގުޅިގެން އުފައްދާފައިވާ އާލާތްތަކުގެ އެހީގައެވެ. ސައިންސްވެރިން އަންދާޒާ ކުރާ ގޮތުގައި މި ހާދިސާ ހިނގާފައިވަނީ ކައުނުގެ އުމުރުން ގާތްގަނޑަކަށް 2.5 ބިލިއަން އަހަރުގައެވެ.
މި ބާރުގަދަ ގޮވުން ދުނިޔޭގެ އެހެން ބައެއް އޮބްޒަވޭޓަރީތަކަށްވެސް ވަނީ ރެކޯޑު ކުރެވިފައެވެ. އެސްޓްރޮނޮމަރުން ބުނާ ގޮތުގައި މި ގޮވުން ހިނގާފައިވަނީ ދުނިޔެއާ ވަރަށް ދުރު ހިސާބެއްގައެވެ. އަދި މި ގޮވުމުގެ އަލި ދުނިޔެއާ ހަމައަށް ފޯރުމަށްޓަކައި 11.3 ބިލިއަން ލައިޓް އިޔާސް (އަލީގެ އަހަރު) ކަމަށް ވަނީ ކަނޑައަޅާފައެވެ.
ދިރާސާކުރާ ފަރާތްތަކުން ގަބޫލުކުރާ ގޮތުގައި މި ގޮވުމަކީ އިރުގެ ބޮޑުމިނަށްވުރެ އެތައް ގުނައެއް ބޮޑު ތަރިއެއްގެ ބާރުގަދަ ގްރެވިޓޭޝަނަލް ކޮލެޕްސް ނުވަތަ ތަރި ގޮވައިގެން ދިޔުމުގެ ސަބަބުން އުފެދުނު ގޮވުމެކެވެ. މިފަދަ ގޮވުންތަކަކީ ކައުނުގައި ހިނގާ އެންމެ ބާރުގަދަ ހާދިސާތަކުގެ ތެރޭގައި ހިމެނޭ ކަންކަމެވެ.
ރަޝިޔާގެ ސެޓެލައިޓުގައިވާ ސްޕެކްޓްރޯމީޓަރަކީ މިލްކީވޭ ގެލެކްސީން ބޭރުގައި ހިނގާ ބާރުގަދަ ގޮވުންތަކުގެ އިތުރުން، އަހަރެމެންގެ ގެލެކްސީގެ ތެރޭގައި ހިނގާ ގޮވުންތަކާއި އިރުން ފޮނުވާ ބާރުގަދަ ދޯދިތައް މޮނިޓަރ ކުރާ އާލާތެކެވެ.
ޖިއޯސްކޭން އިން ދަނީ ކައުނުގެ ދިރާސާތައް ކުރުމަށްޓަކައި އެ ކުންފުނީގެ ސެޓެލައިޓްތައް އިތުރުކުރަމުންނެވެ. މީގެ އިތުރުން، ދުނިޔެއަށް އިންޓަނެޓްގެ ހިދުމަތް ފޯރުކޮށްދިނުމަށްޓަކައި އާ ޖީލުގެ ސެޓެލައިޓްތަކެއް އުފެއްދުމުގެ މަސައްކަތްވެސް އެ ކުންފުނިން ދަނީ ކުރަމުންނެވެ.
